單車青藏線- 中秋.唐古拉山.5231米

單車青藏線- 中秋.唐古拉山.5231米






「一輛單車,一頂帳篷,單騎22天,行程2200千米,最後登上海拔5231米,完了單車夢。」這段充滿數目字的說話,是我在出發前,在一個內地單車論壇上看到的。

究竟踩單車入藏,為的是挑戰一個海拔高度,抑或為了一路上的好風光?我的答案是「兩者皆正確」。其實日日踩車踩8個鐘流流長,大把時間俾你去諗,關於自己既「旅行的意義」,而呢個尋找過程,先係旅行最開心既經歷。今日就不談風景,不談海拔,只講每日踩車呢8個鐘,我個腦到底諗緊咩野。

一直以為踩到唐古拉山最高點,或抵達拉薩布達拉宮的一剎,都會因為完成「單車夢」而熱淚盈眶一下,結果兩者都沒有,反而每次既眼淚,都係踩緊車時流下的。吹住強勁逆風,行李拖著後腿,踩車上斜時的速度,時速好可能只有每小時1至2公里(km/hr),就是比步行更慢的速度。這時候,你會埋怨上天,希望用唯一空閒的嘴巴,爆出粗口抵抗狂風,抒發完畢後,你會懷疑自己是不是有精神病。

上斜無事幹,眼睛盯緊單車上的碼錶,期望那個累計距離的數字,可以跳得更快,看久了,數字變成綿羊,你會進入一個雙腳在動,但腦子在睡的狀態,輕易就會發好幾個白日夢。這時若一下子風吹得更猛,或羊隻在旁邊叫喊,還在發夢於家中enjoy躺沙發的你,靈魂忽然被召回歸位,驚醒後發現自己正在一條荒蕪既公路上踩車,你唔明白自己係度做緊咩野,腦海裡不斷flashback 由出發到現在的種種點與滴,突然「叮」一聲,你得到你想要既答案,那個屬於自己既「旅行的意義」,在腦內投影得非常清晰。我的那個投影片,告訴我:「去吧」。

所以,踩單車入藏,挑戰海拔高度,或是路上的風景,都未必是重點,最珍貴的,是那一個堅持自己,用腳,用腦,用力去尋找自己的過程。風這刻更大了,我不能接受用比腳行得更慢的速度去騎車,下了車,用手推單車,繼續往唐古拉山5231米頂點進發,輕鬆地跟自己說,「去吧。」。

英國探險家George Mallory,被問及為何想要攀登珠穆朗瑪峰時回答說:"Because it's there"。這經典名言被廣泛引用,中文翻譯成「因為山在那裡」,我認為譯得過份仔細,改成「因為它就在那裡」更好,山不山,並不重要,呼喚George Mallory的,可能不是山,到底是什麼,我相信他也不知道,只好hea答《紐約時報》。

「旅行的意義」,其實就係咁簡單,咁鬼hea,從來無咩野大道理大意義。因為當初你拿著勇氣出走,經歷過汗水,每天面對自己內心,合起來,發酵了,你又再認識了自己多一點,山不山,入藏不入藏,騎車不騎車,都不是重點。登上唐古拉山的那天是中秋,晚上打電話告訴呀媽,唐古拉山看到的月亮,很大很圓很誇張,跟她說了一句,最快樂的「中秋快樂」。掛線後,繼續踩,感激家人對自己的支持,流眼淚了。








唐古拉山看到的月亮,很大很圓,月亮剛剛上山時,我還以為山頂上有個發光的太空館。










單車青藏線- 老闆娘愛集郵


單車青藏線- 老闆娘愛集郵



「高山羊,沒羊羶味,跟你們廣東的不同。」民宿老闆娘跟我們說。

「高山羊在4000米海拔以上,一只值1200元,相比普通的山羊只值500元。」

於唐古拉溫泉鄉民宿內,
老闆娘整左個「手抓羊肉」我地食,
「手抓羊肉」係去西藏必食的菜式之一,
黎到旅程第十五日,
「終於」可以扮食家,
寫返個食評。

一直以為羊肉裡面既「羊肉味」,
就係羊羶味,
但係家陣咀嚼緊既呢舊羊肉,
原來真係可以無羶味!
證明人地話「食雞有雞味」,
有時係未必係正確架。

嘴裡呢舊「高山羊肉」,
細而緊致,Q彈無比,
灑上孜然粉、辣椒粉,不得了,
唔慣食羊肉既澤西食過都覺得好味。

羊肉味加上孜然粉、辣椒粉。
新鮮羊肉呀
每日旅程,
除左食野口味無咩變,都係羊肉呀面條呀之外,
每日都可以識到唔同既新朋友。

今日既新朋友,就係民宿「靳老闆」一家,
同時唔同,
佢地對我地既稱謂,
唔再係「嘉西」或「澤西」,
而係「五號」、「六號」。
「五號、六號,食晚飯啦!」老闆娘「魯芬」咁既聲嗌我地。

原來我地係「第五」同「第六」個,
佢地屋企所招待過既香港人,
對於每位來自五湖四海的旅客,
佢地印象都會特別深,
因為老闆夫婦對路過既單車客,
有無窮既話題,
除此之外,
有樣興趣佢地好喜歡公諸同好,
就係集郵,集紙鈔。

「要給你們床位都可以,先拿港幣來!」
一入門口,老闆娘就咁同我地講,
我地都嚇一嚇,一睇就知我地係香港人?

坐底後,老闆夫婦拎出佢地既珍藏,
兩人講話粗粗魯魯,但拎起郵票紙鈔時,相當細心,
收過我地「五號」、「六號」僅有帶在身既港幣紙鈔後,
兩個人都笑得好開心。

翻開珍藏寶鑑,
手多多發現,
裡面收藏了幾張澳紙,
老闆娘一察覺我既目光,
就急不及待分享幾張「澳紙」裡面既故事。
「有一個中國女孩,
跟一個澳洲來的男孩,
騎自行車到西藏,
回去後就結婚了,
到現在還有給我寄信。」

集郵、集紙鈔,
我想老闆夫婦更開心的是,
集合大家的故事,集合大家的回憶,
每張郵票,每張紙鈔,
都印住每位旅行家的故事。

集郵。

集紙鈔。
老闆娘:「他們不給港鈔的話,不給他們食飯。」
其他珍藏品,好像是狼牙。

人民幣的故事。
講完澳紙,
老闆拎左兩張人民幣出黎,
外行人唔識貨,
但老闆話其中一張有印有人民公仔的,係珍品。

「人民幣叫人民幣,因為以前的紙幣上,
都印著人民,跟今天的,已經不一樣了。」老闆說。

老闆娘提供旗子,讓單車客簽名「到此一遊。」

老闆女兒好鍾意提我地周圍參觀。

路過客人留下的。

我地都要整返張,畫得好似架。
原圖。

簽完名,連埋即影即有合照送俾老闆娘一家。
老闆大家自得其樂,晚上宵夜打邊爐,窩內的不是翠玉瓜,係類似魚旦的東西。


晚上睡的地方,幾個男人要孖鋪再孖鋪。
今晚少有到午夜先訓覺,
平時寫完日記一早就訓,
因為無野做。

但今日我地「五號」同「六號」兩個人,
除左要「被迫」表演澤嘉西MV俾老闆娘睇外,
仲同埋老闆成家在大廳睇電視睇到深夜,
先係《天天向上》,再到《新白髮魔女傳》。
原來內地節目非常好睇,
呢兩套電視節目,
令我地往後踩車時踩得特別起勁,
因為,
要趕住每日快D踩到目的地,
撻著部電視「煲劇」。

睇完電視,
臨訓前,
見到老闆娘係廳後面,
拎住我地張即影即有合照,
企係度傻笑。

有緣的話,下次黎到再同你影多張。

老闆娘拎住張即影即有合照,睇左好耐。





--------------
筆者嘉西 跟 好友澤西 於2012年9月從西寧花20多天經青藏線騎單車到西藏,致力把無厘頭帶到西藏。
澤嘉西踩西藏 facebook連結:
https://www.facebook.com/chakawest2012?fref=ts
嘉西旅行筆記 facebook連結:
https://www.facebook.com/kawest.travel?ref=hl
筆者嘉西Email: blackka76@yahoo.com.hk




「每日一跑一歌趕走脂肪肝」#1


「每日一跑一歌趕走脂肪肝」#1
Cicada - 《匯流向海 into the Ocean》


能夠就咁換對鞋,塔LIFT落樓下,
幾分鐘路程,就到附近河邊跑步,係一種幸福。

有水既地方,特別安靜,
但人類就係矛矛盾盾,越安靜,你越會諗野。
寧靜如此,大腦會自動幫你,
過濾今日發生過既所有事情,
有咩開心、有咩傷心,
有咩傷心、有咩開心,
有咩傷心、有咩傷心,好鬼煩。

《匯流向海 into the Ocean》呢個歌名,
我學多幾年中英文都無法改個咁靚既名。
今晚一路跑,一路望海,一路聽歌,
除左沾沾幻想對面河畔有鏡頭拍住我呢個MV男主角外,
其實真心覺得,望住個海,心情好難會差,
就算差極都總有個譜。
「匯流向海」,你懶醒想望下個海既盡頭O係邊,
大海無量,你一世都唔會望得到,
既然望唔到,世界咁鬼大,
我地咁渺小,宜家唔開心D咩?

講完老土野,講個得意統計數字俾你地聽,
返到屋企後,上網GOOGLE 「自殺方法統計數字」,
想搵下到底跳樓自殺既人多,抑或係跳海自殺既人多。
答案相當有趣,根據2007既統計數字,
跳樓既佔55%,跳海既只佔3%。

唔能夠否認塔LIFT上天台,
交通應該遠比塔車在天橋中間落車方便,
但我覺得,
半個鐘前諗唔開既您,
望住個海,諗多陣,
我相信你會行返轉頭。

分享完畢,
回到依然在河邊跑步既你,
大腦都仲幫緊你過濾今日發生過咩野事情,
有工有私,
你要識得將好野KEEP起,
衰野篩走,篩唔走既話,
總有方法處理,
就如污水處理廠都有沼氣,
唔識既以為臭死鄰居,
行前一步,你可以拎佢去做燃料,
燒兩燒,力量返來了,
經一事蔡一智,人又長大了。

單車青藏線- 在廁所裡的溫泉

單車青藏線- 在廁所裡的溫泉


廁所浸溫泉?
無錯,仲要天花板會漏水。
香港人夢寐以求既溫泉浴,
應該係冰島呀日本呀綠島呀,
就算無得睇雪睇日落,都有間私人房仔浪漫一下。

呢度個溫泉樣樣都無,
不過更加好玩,
呢個溫泉就係今日既目的地- 唐古拉溫泉。

終於可以道別高山症的藥物。

休息過後變回小白臉樣子帥了的澤西。

唔好忘記另一位同輩澤西,
剛從高山症恢復過來,
已經休息了一日,訓足了24小時。

係澤西一直沉睡既24小時裡面,
我做左好多野。

第一件事係要修理好自己架單車,
轉波系統壞了,如果修不好,
往後的上山路會很痛苦。
出發前已經上了單車維修班,
但現在屢修不果,
唯有上網whatsapp 支援隊的單車前輩,
跟單車苦戰8小時,終於修好,
消磨時間之餘,又學到維修技巧。

第二件事,尤其重要。
澤西出現明顯的高山反應,
在他床邊的我其實好徬徨,
根本未遇過高山症呢種東西,
就算上過急救上過野外醫療等課程,
呢一刻對我思考上絕無幫助。
高山症會死人的?
繼續踩?放棄?
前面就係青藏線最高的唐古拉山,(1)
唔踩過去就好似等同無黎過一樣,
真係要放棄?

腦海一片混亂,
手指只在電話裡,
重覆copy and paste 同一條問題,
傳到不同人的whatsapp裡。
「我地應唔應該繼續?」
「唔好再繼續啦!塔車直接去拉薩啦!」大家的回答好一致。

心裡再感到可惜,
理性都告訴我:「要停啦。」
whatsapp 一位最好的朋友說:
「後悔叫左澤西一齊黎。」
當時既我,咁衰既說話都講得出。

但,安全要緊。下次再踩過。

次日早上,
澤西起床,好似回光反照一樣咁精神,
「好!出發,等咩呀?」澤西問。
「你肯定你無事?」我以為佢訓傻左。
「踩啦,無野既。」聽到澤西回答,
突然對踩上「唐古拉山」有失而復得既感覺,
但仍然擔心安全問題,所以決定今天會坐車到唐古拉山山腳,
節省部份腳程,休息多一天再戰唐古拉山!

DIY 單車維修架 - 用一條行李帶把單車縛到桌子上。 
在路邊截順風車,遇上從拉薩過來的鐵騎旅客。 
在路邊截了4小時車,有村民提點可以找「無車牌」的面包車。(2)

司機大哥把我們送到唐古拉山溫泉。 
我要跟澤西分開坐,因為司機心愛的酥油已經霸佔了一個座位。

就是這些「無牌」面包車,一架4萬塊。
道別司機大哥。 
重新裝上單車,踩回後方的唐古拉山溫泉鄉。



乘車渡過沱沱河後不久,
就在唐古拉山溫泉下車。

從車上看到沱沱河的住宿環境,
好像《星球大戰》Little Skywalker 跟母親住的偏遠星球,
比之前的地方更荒涼,
絕不適合我這個肥仔跟帶病在身的澤西在這休餐,
看來乘車減輕腳程的決定不錯。

重裝好單車後,
已經聽到兩把熟悉的聲音。
原來袁大哥跟馬博士剛剛騎到這裡!

找了間叫「自行車之家」的藏民小店,
可以提供住宿及餐食,
住房費一人30塊。

老闆娘遠處已經叫我們,
先去浸溫泉,
免費的,浸過再回來。

「下?咁荒涼真係有溫泉浸?我以為只係地方名叫溫泉。」
其實依然未知澤西好返未,
浸完熱水出返黎凍親就大件事,
不過,踩左咁多日車,
點都要享受一下海拔4500米以上的溫泉!
好!把單車泊下小店旁,
就馬上去後山搵「唐古拉溫泉」!

馬大哥帶我們到自行車之家落腳。

估下前面間屋仔係咩?廁所?岩啦,你答得岩,有睇標題就知道係溫泉啦。
一路走一路行,到底邊度有溫泉呀?
前一大片平原荒漠中,只有一間屋仔,
呢間屋仔殘舊破落,
日光日白底下望過去依然覺得恐怖,
感覺似《潘神的迷宮》咁,
入左去就會通去地下世界。

行得越黎越近,
「真係溫泉呀!聞到硫磺味!」
入到去!不得了!
真係廁所咁樣,好大個浴缸,
有一個出水位,長期有充滿硫磺味的熱水流出,
缸邊有一堆舊報紙,
相信係俾你用黎阻塞去水位,
好似自己屋企咁,裝溫泉水浸溫泉。

馬博士(右邊)對呢度充滿懷疑,「真係溫泉黎?」
聽聞硫磺溫泉水流過的地方都會染黃。

好正呀浸緊腳,踩左咁多日,呢度又凍,加埋環境,你可能一世都未試過。

又再令我有《潘神的迷宮》感覺的,就係牆上有一堆看不明白的中文字。
什麼是「擼管」?為何「擼管」會擼出血? (3)

為什麼「擼管」要帶老婆來?

感動的合照,有你有我情有天有溫泉有地。 
從「廁所溫泉」望回唐古拉溫泉。
4500米海拔在廁所裡面,
4個大馬騮一齊浸溫泉
再拍埋我地既MV,
夫复何求呀。

唐古拉山溫泉MV 0:57開始 



註:
(1) 唐古拉山:青藏線的最高點,海拔5220米,是自行車客最嚮往攀越的地方。
(2) 「無車牌」面包車:因為拉薩買車貴,有藏民會在較遠的蘭州買車,然後在「無牌」的情況下駛回拉薩再登記。所以一般車內只有司機一人,容易接載路上的旅客。
(3) 擼管:意思請自行 google search。

--------------
筆者嘉西 跟 好友澤西 於2012年9月從西寧花20多天經青藏線騎單車到西藏,致力把無厘頭帶到西藏。
澤嘉西踩西藏 facebook連結:
https://www.facebook.com/chakawest2012?fref=ts
嘉西旅行筆記 facebook連結:
https://www.facebook.com/kawest.travel?ref=hl
筆者嘉西Email: blackka76@yahoo.com.hk